2027 నాటికి భూ రికార్డులు క్లీన్: సిద్ధాంతంలో సీఎం చంద్రబాబు

పశ్చిమ గోదావరి జిల్లా సిద్ధాంతంలో సోమవారం నిర్వహించిన 'మీ భూమి - మీ హక్కు' సభలో ముఖ్యమంత్రి చంద్రబాబు కీలక ప్రకటనలు చేశారు. 2027 నాటికి రాష్ట్రంలోని భూ రికార్డులన్నింటినీ ప్రక్షాళన చేసి, ప్రతి రైతు చేతిలో తప్పులు లేని పట్టాదారు పాస్‌బుక్‌ ఉంటుందని ఆయన స్పష్టం చేశారు. గత ప్రభుత్వ హయాంలో భూ రికార్డుల నిర్వహణలో జరిగిన అవకతవకల కారణంగా రాష్ట్రంలో గందరగోళ పరిస్థితులు నెలకొన్నాయని, పచ్చని గోదావరి జిల్లాల్లో సైతం భూవివాదాలకు ఆజ్యం పోశారని ఆయన ఆరోపించారు. రాజముద్రతో కూడిన కొత్త పట్టాదారు పాస్‌బుక్‌ల పంపిణీ కార్యక్రమాన్ని ప్రారంభించిన అనంతరం ఆయన ప్రజలను ఉద్దేశించి ప్రసంగించారు.

2027 నాటికి భూ రికార్డుల ప్రక్షాళన

గత ప్రభుత్వ నిర్వాకాల వల్ల భూ రికార్డులు పూర్తిగా తారుమారయ్యాయని, ప్రభుత్వ ఆధీనంలో ఉండాల్సిన కీలక సమాచారాన్ని ప్రైవేటు వ్యక్తులకు కట్టబెట్టే ప్రయత్నం చేశారని ముఖ్యమంత్రి చంద్రబాబు విమర్శించారు. ప్రజా ప్రభుత్వం అధికారంలోకి వచ్చిన వెంటనే ప్రజల ఆస్తులకు రక్షణ కల్పించేందుకు ల్యాండ్ టైటిలింగ్ యాక్ట్ లాంటి ప్రమాదకరమైన చట్టాన్ని రద్దు చేశామని గుర్తుచేశారు. 

ప్రస్తుతం జారీ చేస్తున్న పట్టాదారు పాస్‌బుక్‌లకు కరెన్సీ నోట్ల తరహాలో క్యూఆర్ కోడ్‌తో పాటు అత్యంత పటిష్ఠమైన భద్రతా ఫీచర్లను పొందుపరిచామని వివరించారు. రికార్డుల ప్రక్షాళన ఒక సంక్లిష్టమైన ప్రక్రియ అని, గత పాలకులు సృష్టించిన గందరగోళాన్ని సరిదిద్దడానికి సుమారు మూడేళ్ల సమయం పడుతుందని అంచనా వేశారు. 2027 నాటికి రాష్ట్రంలోని ప్రతి రైతుకు కచ్చితమైన, వివాదరహితమైన పాస్‌బుక్‌ అందించి తీరుతామని ఆయన హామీ ఇచ్చారు.

రెవెన్యూ శాఖలో సమూల మార్పులు

భూ రికార్డుల వ్యవస్థలో పారదర్శకత, భద్రతకు పెద్దపీట వేస్తున్నామని చంద్రబాబు తెలిపారు. దేశంలోనే తొలిసారిగా బ్లాక్‌చెయిన్ ఆధారిత భూ రికార్డుల వ్యవస్థను అమలు చేస్తున్నామని, దీని ద్వారా ప్రతి భూమి యూనిట్‌కు ఒక శాశ్వత బ్లాక్‌చెయిన్ ఐడీ కేటాయిస్తామని వెల్లడించారు. ఈ విధానంతో రికార్డులను ట్యాంపరింగ్ చేయడం అసాధ్యమని స్పష్టం చేశారు. 

ఇప్పటికే 'రీ-సర్వే 2.0' కింద 1,836 గ్రామాల్లో తుది రికార్డ్ ఆఫ్ రైట్స్ (ROR) పూర్తి చేశామని, విక్రయం, బహుమతి, విభజన వంటి 9 లక్షల లావాదేవీలకు 100 శాతం ఆటోమేటిక్ మ్యుటేషన్ ప్రక్రియను అమలు చేస్తున్నామని తెలిపారు. వాట్సాప్ ద్వారా మ్యుటేషన్ దరఖాస్తు చేసుకునే, దాని స్థితిని తెలుసుకునే సౌకర్యం కల్పించామన్నారు. 

వారసత్వ హక్కుల బదిలీని సులభతరం చేశామని, రూ.10 లక్షల లోపు విలువైన ఆస్తులకు కేవలం రూ.100 నామమాత్రపు రుసుముతో బదిలీ చేస్తున్నామని వివరించారు. తిరుపతి జిల్లాలో దశాబ్దాలుగా నలుగుతున్న శెట్టిపల్లి గ్రామ భూముల వివాదాన్ని పరిష్కరించామని, 1.37 లక్షల ఎకరాల విలేజ్ సర్వీసు ఇనామ్ భూములను 22ఏ జాబితా నుంచి తొలగించామని గుర్తుచేశారు.

గొడ్డలి పార్టీకి రాజకీయ అర్హత లేదు

ఈ సందర్భంగా ముఖ్యమంత్రి ప్రతిపక్షంపై తీవ్రస్థాయిలో విరుచుకుపడ్డారు. "గొడ్డలి పట్టే చేతులకు నాగలి పట్టే రైతుల కష్టాలు ఎలా తెలుస్తాయి? కోడికత్తి డ్రామాలు ఆడేవారికి వరికోతల గురించి ఏం తెలుస్తుంది?" అంటూ ఎద్దేవా చేశారు. గంజాయి బ్యాచ్‌లను ఓదార్చే వారికి పంటల సాగు విలువ తెలియదని విమర్శించారు. 

తాము రాజముద్రతో ప్రజలకు హక్కు పత్రాలు ఇస్తున్నామని తెలిపారు. గత పాలకులు దొంగ పట్టాలు సృష్టించి భూ కబ్జాలకు పాల్పడ్డారని ఆరోపించారు. తెలంగాణలో ఎమ్మార్వో, జేసీ సంతకాలను ఫోర్జరీ చేసి రూ.1500 కోట్ల విలువైన భూములను కొట్టేసిన వారి పార్టీ నేతను ఎందుకు సస్పెండ్ చేయలేదని ప్రశ్నించారు. నేరాలు చేసి ఎదుటివారిపై బురద చల్లడం గొడ్డలి పార్టీకి అలవాటని, రాష్ట్ర ప్రజలకు, నిరుద్యోగులకు క్షమాపణ చెప్పే వరకు వారికి రాజకీయాలు చేసే అర్హత లేదని తేల్చిచెప్పారు.

సంక్షేమం, అభివృద్ధి సమపాళ్లలో

కూటమి ప్రభుత్వం రెండేళ్ల పాలనను విజయవంతంగా పూర్తి చేసుకుందని, ఈ కాలంలో సంక్షేమం, అభివృద్ధి, సుపరిపాలనను సమపాళ్లలో అందించామని చంద్రబాబు అన్నారు. ఈ విజయాలను ప్రజల్లోకి తీసుకెళ్లేందుకు తిరుపతి, అమరావతి, విశాఖపట్నంలో మూడు భారీ సభలు నిర్వహిస్తున్నామని తెలిపారు. సూపర్ సిక్స్ హామీలతో పాటు, చెప్పినవాటి కంటే అదనంగా సంక్షేమ పథకాలను అమలు చేస్తున్నామని వివరించారు. 

పెన్షన్లు, తల్లికి వందనం, స్త్రీశక్తి, అన్నదాత సుఖీభవ వంటి పథకాల ద్వారా అన్ని వర్గాల ప్రజలకు అండగా నిలుస్తున్నామన్నారు. డీఎస్సీ ద్వారా 16,000 ఉపాధ్యాయ ఉద్యోగాలను భర్తీ చేశామని, దీన్ని చూసి ఓర్వలేకే ప్రతిపక్షం అనవసర ఆరోపణలు చేస్తోందని మండిపడ్డారు.

ఆక్వా, ఫుడ్ ప్రాసెసింగ్‌కు పెద్దపీట

గోదావరి జిల్లాల అభివృద్ధిలో ఆక్వా, ఫుడ్ ప్రాసెసింగ్ రంగాలకు అత్యధిక ప్రాధాన్యత ఇస్తున్నామని ముఖ్యమంత్రి స్పష్టం చేశారు. ఆక్వా జోన్ పరిధిలోని చెరువులకు యూనిట్ విద్యుత్‌ను కేవలం రూ.1.50కే అందిస్తున్నామని గుర్తుచేశారు. సోయాబీన్ మీల్ దిగుమతులపై సుంకాలు తగ్గించి, ఫీడ్ ధరలను నియంత్రించాలని కేంద్రాన్ని కోరామన్నారు. ఆక్వా వ్యర్థాలనుంచి న్యూట్రాస్యూటికల్ ఔషధాలు తయారు చేయడం ద్వారా కాలుష్య సమస్యను అధిగమించడంతో పాటు, అదనపు ఆదాయం కూడా సృష్టించవచ్చని సూచించారు. పశ్చిమ గోదావరి జిల్లాలో ఫుడ్ ప్రాసెసింగ్ పరిశ్రమల ఏర్పాటుపై ప్రత్యేక దృష్టి సారించామని వివరించారు.

యోగాంధ్రతో ఆరోగ్యవంతమైన రాష్ట్రం

ప్రజల ఆరోగ్యం ప్రభుత్వ ప్రథమ ప్రాధాన్యత అని చంద్రబాబు అన్నారు. ఆగస్టు 15 నాటికి రాష్ట్రవ్యాప్తంగా 'సంజీవని డిజిటల్ హెల్త్ రికార్డ్' కార్యక్రమాన్ని అందుబాటులోకి తెస్తామని ప్రకటించారు. అంతర్జాతీయ యోగా దినోత్సవం సందర్భంగా జూన్ 21న కోటి మందితో 'యోగాంధ్ర' కార్యక్రమాన్ని నిర్వహిస్తున్నామని, ప్రతి ఒక్కరూ ఇందులో భాగస్వాములు కావాలని పిలుపునిచ్చారు. 

2047 నాటికి ఆంధ్రప్రదేశ్‌ను సంపన్నమైన, ఆనందకరమైన, ఆరోగ్యకరమైన రాష్ట్రంగా తీర్చిదిద్దడమే తమ లక్ష్యమని పునరుద్ఘాటించారు. అనంతరం, సభా ప్రాంగణంలో ఏర్పాటు చేసిన స్థానిక ఉత్పత్తుల స్టాళ్లను సీఎం పరిశీలించారు. ఈ కార్యక్రమంలో మంత్రులు గొట్టిపాటి రవికుమార్, అనగాని సత్యప్రసాద్, నిమ్మల రామానాయుడు, ఎమ్మెల్యే పితాని సత్యనారాయణ తదితరులు పాల్గొన్నారు.